توت تووت توووت

يا بنكرياسي يا بنكرياسي
أنت ليه علي كده قاسي
لا بتاخد و لا بتدي
و لا أنت هادي و لا أنت سياسي
تعبتني  و تعبت أهلي و ناسي
الجسم كله علشانك حزين
و ماليه الشجن و الأنين
من قدمي لقلبي لعيني لكليتي لرآسي
كنت في الأول يدوبك شغال
بتطلع انسولين على قدك
و أنا مش فاهم
و بأديله رز و عيش عمال على بطال
 يا ريتني كنت أعرف اللي أنا عارفة دلوقتي.
ما كانش الحال بقى هو الحال
وقتها المشكلة كانت سهلة و مش محتاجة
شوية تحسين مقاومة ..يعني و لا حاجة

أعمل إيه يا عالم
دلوني...
قالوا لي روح لفلان ..طبيب  سكر مشهور
السكر في إيده كتاب من عشر سطور
الحق و روح لم الدور
الراجل ده مخه يتلف في حرير
 حيضبطلك المسائل
و حيعالجك صح بكل الوسائل
رحت للمشهور
من شارع لشارع لزقاق لحارة
أوضة كبيرة فيها اباجورة
و علي الحيطة متعلقة صورة
صورة قلب و شرايين زرقا
قلقت من الصورة – لكن قلت لنفسي مش فارقة
المهم أضبط سكري بالقلم و الورقة
مكتب كبير و في آخره قاعد واحد بيدخن
شكله فاهم و مدكِّن
شافني.. أتعوج و بص لي من تحت النضارة
و قال لي شوف يا بني 
حأكتب لك دوا يخلص لك الحكاية بشطارة
و على الله التساهيل
الدوا أسمه أماريل
و دي كانت نهاية بنكرياسي الحزين
سنة و خلص الأنسولين
مافيش فايدة أرقامي ما بتنزلش
و السكر ما ينضبطش
صرخت بصوت عالي
يا عالم سكري  علي طول عالي
و السكر بيفرتك في الجسم
و الجسم و الله غالي
يا رب أشكي لمين حالي
قالوا لي روح لواحد تاني ..برضه مشهور
اللي علشان تحجز عنده

تستني أيام و شهور
حجزت و أستنيت بسرور
و رحت... يا ريتني ما رحت
حسيت لما شفته
إنه عالم كبير و أنا برغوت
فهمان.. و ما عندوش رحمة و بيشوط
قال لي يا بني  السكر ما فيش منه أمل
ده مرض مسيره في نزول و هبوط
يعني أنت رايح رايح
و المطش ده مش شوطين ، ده بالنسبة لك شوط
ما تحرمش نفسك بأه
عيش و رز و بطاطس و فروت
و بيتزا و عصاير و منجة و بسكوت
و عنب و جوافة و أناناس و توت
اللي عنده سكر ياخد أنسولينه
و ياكل كل حاجة
لحد ما بسرعة يموت
توت توووت توووووت
شميت ريحة دجل و شعوذة
و حلو يا حلو و أشتاتا أشتوت
حأكتب لك حاجة تكمل عليك
و كتب لي أنسولين المخلوط
و أنا حمار ، قال إيه فرحان بروشتة الموت
و طلعت من عنده مبسوط
و كانت دي ضربة قاضية لسكري بالشلوت

عليه العوض و منه العوض في بنكرياسي اللي راح
صعبت علي نفسي

و حلفت لأعلم نفسي بنفسي
مسحت الجراح
و قمت من تاني و منعت السكوت
أتعلم و من غير يأس و لا قنوط
و اقلل علو سكري و الهبوط
و أوصَّل اللي أعرفه للناس بالكتابة و الصوت
قريت كتب كتير
و قريت كتابه في سنتين
كتاب رائع و رزين
خلاني ندمت علي السنين
و مستوانا الحزين

علمني كتاب د. برنستين
السكر في كلمتين
السكر أخطبوط !!
لو فَهمته تُحكمه
و لو أهملته تُموت