هندسة الأنسولين

 

بالعامية المصرية ..سامحوني بس هو تدفق أفكار سريع ...

 

يا جماعة  الخير في حاجة مهمة أوي عايز أشرحها و عايزكم تفهموها و تفكروا فيها و أنا أحب أسميها هندسة الأنسولين أو Insulin Engineering و دي موجودة في كتاب فكر مثل البنكرياس بعد شوية تعديل مني حسب خبرتي مع الأنسولين..ركزوا معاي شوية:

أولا: أنت لا يمكن لا يمكن أبدا أن تضاهي و تماثل شغل البنكرياس الطبيعي و لكنك بتحاول تقرب بس من شغله و لكن كل ما تعتقد إنك ممكن تأكل أنت لو كنت سكري أو تأكل أبنك لو كان سكري 250 جم كربس في اليوم و تقعد تلعب بالأنسولين يمين و شمال و قبل و بعد و فوق و تحت علشان تضبط جرعة الأنسولين ..مش حينفع

أنا مش عارف مع الكربوهيدرات العالية و سندوتشات البطاطس و الكورن فليكس و البرياني  و و و ... حتضبط إيه بالضبط ...عدد جم الكربس (اللي ممكن يبقي غلط) و لا وقت الهضم اللي ممكن يبقي بدري أو متأخر و لا بداية إرتفاع السكر في الدم !!! تبقي إمتي و لا عدد وحدات الأنسولين و لا توقيت الحقن.......

أنا كسكري بأقول لك مش حيحصل و د. برنشتين اللي أنت عرفتوه كويس من كتر كلامي عليه بيقولك مش حيحصل you can not mimic the work of original pancreas و النتيجة ما أراه كل يوم أرقام يا 300 يا  40  لأطفال سكريين غلابة و هو ده اللي بيقوله برنشتين ....مدخل صغير (كربس أقل و بالتالي أنسولين محقون أقل) = خطأ صغير يمكم إصلاحه بسهولة..

طيب إزاي تعرف إنك بتأخد أنسولين كتير شوف:

في كتاب فكر مثل البنكرياس جاري شاينر عامل جدول أنا عملته قبل كده علي شكل اكسيل شيت سميته Insulin requirement  يوريلك  بحسب وزن و درجة نشاط الطفل السكري.. ما هي الحدود القصوي و الدنيا للأنسولين اللي المفروض الطفل يأخده أو السكري البالغ يأخذه.

مثال:

أبنك وزنه 30 كجم و سنه تحت سن البلوغ و نشاطه الرياضي متوسط المفروض يأخد من 0.5 إلي 1 وحدة لكل 1 كجم من الجسم يعني من 15 إلي 30 وحدة أنسولين (كلي يعني نوفو + لانتوس) ...ماشي كده..حسب الجدول في كتاب think like Pancreas By Gary Sheiner.

و المفروض يأخد لانتوس من 0.2 إلي 0.5 وحدة لكل كجم من جسمه (اللي هو 30 كجم) يعني من 6 إلي 15 وحدة لانتوس في اليوم

إزاي بأه تعرف إنك بتأكله كربس كتير :

لو النوفو عنده أعلي من اللانتوس مثلا في الحالة دي بيأخد 20 نوفو و 10 لانتوس يبقي بيأكل كربس كتير و كلما زاد الفرق يبقي بيأكل كربس كتير أوي..

و لو بيأكل كربس أقل حيبقي النوفو أقل من اللانتوس يعني مثلا 12  نوفو و 18 لانتوس و لو الفرق زاد أوي يبقي بيأكل كربس أقل أوي ..

كلما قللت النوفو عن اللانتوس ..مع الوقت اللانتوس حيقل و كمان الأنسولين الكلي حيقل لأن حساسيته حتتحسن و حتتحسن جدا

كمان مثال:

أنا كنت بآخد 50 لانتوس و 35 نوفو لما كنت بآكل حوالي 150 [جم كربس في اليوم ..دلوقت تحت ال 50 جم كربس في اليوم بآخد 29 لانتوس و 8 نوفو....شايفين الفرق الرهيب ..

الأنسولين الكتير ضرر و الله ضرر ...فكروا و كل واحد يقيس نفسه أو أبنه علي مقياس اللانتوس أعلي و لا النوفو أعلي و لو النوفو أعلي قلل الكاربس علشان حساسيتك تتحسن للأنسولين و سكرك يبطل طلوع و نزول و ترحم نفسك أو أبنك من المضاعفات

ما حدش بقي يقول لي طب و النشويات و أعمل إيه هو بيحب كده ..أنا مش قادر أضغط عليه ...إلخ ...ده أختيار و ألتزام و ربنا خلق الكربس في النشويات و في الخضار برضه و البدائل كتير بس أهم حاجة صحة الأولاد علشان نحميهم من المضاعفات..

أنا بأجيب لكم من الآخر مش حتعرف تقلد البنكرياس و إن مش مصدقني راجع أرقام إبنك (أو أرقامك أنت نفسك لو أنت سكري) و هو بيأكل كربس عالي و راجعها بس بعد أسبوع من نظام أقل من 100 كربس في اليوم ..